Introduzzjoni u l-Ewwel Metodu ta’ kif ngħidu r-Rużarju

Introduzzjoni għal Metodi ta’ kif ngħidu r-Rużarju

San Lwiġi-Marija de Montfort, missjunarju mimli ħeġġa ta’ esperjenza kbira, wara li wriena l-kobor u l-ħtieġa tar-Rużarju, ma naqasx li jinżel fil-prattika billi tana diversi metodi ħalli nirreċitaw tajjeb ir-Rużarju Mqaddes.

Għalhekk insibu f’din it-taqsima:

1–5                 l-ewwel metodu

6                      metodu ieħor fil-qosor

7–15               metodu għall-Użu tas-Sorijiet Ulied il-Għerf (La Sagesse)

16–4               żewġ metodi oħra li nsibuhom fit-tielet taqsima tal-ktieb tiegħu tal-

priedki

48–56            f’dawn il-paragrafi jagħtina kwotazzjoni meħuda minn ktieb ta’

Justinus Miechovius O.P. dwar (1) il-qawwa u d-dinjita’ tar-Rużarju, u (2) dwar il-kobor tas-Sliema Għalik, Marija.

Fl-aħħarnett San Lwiġi, biex iwassal il-verita’ tal-Fidi lin-nies, kien jinqeda b’ħafna innijiet. Hekk il-kantiku 90 ifisser il-kuruna tar-Rużarju.

Dun Karm Farrugia

Metodi ta’ kif ngħidu r-Rużarju biex niġbdu fuq ruħna l-Grazzji tal-Misteri tal-Ħajja, tal-Passjoni u tal-Glorja ta’ Ġesù u ta’ Marija.

L-Ewwel Metodu

1. L-Ewwel għidu:

Ejja, Spirtu s-Santu, imla’ l-qlub tal-fidili tiegħek u kebbes fihom in-nar ta’ mħabbtek.

Ibgħat l-Ispirtu tiegħek u jinħalqu,

U inti ġġedded il-wiċċ tal-art.

Imbagħad agħmlu din l-offerta tar-Rużarju: “Jiena ningħaqad mal-qaddisin kollha tal-Ġenna u mal-ġusti kollha fuq l-art; ningħaqad miegħek, Ġesù tiegħi, biex infaħħar kif jixraq ‘l Ommok Imqaddsa u biex infaħħar lilek fiha u biha. Jiena nistmerr id-distrazzjonijiet li jistgħu jiġuni jien u ngħid dan ir-Rużarju. O Beata Verġni Marija aħna noffrulek dan il-kredu ħalli nqimu l-fidi li inti kellek fid-dinja u ħalli nitolbuk li jkollna sehem fl-istess fidi. O Mulej aħna noffrulek din il-Missierna biex nadurawk fl-Unita’ tiegħek u nagħrfuk bħala l-bidu u t-tmiem ta’ kull ħaġa. Santissima Trinita’, aħna noffrulek dawn it-tliet Slimiet biex nirringrazzjawk tal-grazzji kollha li tajt lil Marija u dawk li tajtna bis-saħħa tal-interċessjoni tagħha.

Missierna, Sliema għal tliet darbiet, Glorja.

L-Offerti tal-Posti

Il-Misteri tal-Ferħ

2. L-ewwel posta Noffrulek, Mulej Ġesù, din l-ewwel posta f’ġieħ l-Inkarnazzjoni tiegħek. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li tnissel fina qalb umli.

Missierna, Sliema għal għaxar darbiet, Glorja. Il-grazzja tal-misteru tal-Inkarnazzjoni tinżel ġewwa fija u tagħmilni tassew umli.

It-tieni posta Noffrulek, Mulej Ġesù, din it-tieni posta f’ġieħ iż-Żjara ta’ Ommok l-Imqaddsa lill-kuġina tagħha Santa Eliżabetta. Bis-saħħa ta’ dan il-misteru u bl-interċessjoni ta’ Marija nitolbuk karita’ perfetta lejn għajrna.

Missierna, Sliema għal għaxar darbiet, Glorja. Il-grazzja tal-misteru taż-Żjara tinżel ġewwa fija u tagħmilni tassew karitattevoli.

It-tielet posta Noffrulek, Mulej Ġesù, din it-tielet posta f’ġieħ it-Twelid imqaddes tiegħek. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li ninqatgħu mill-ħwejjeġ ta’ din id-dinja u li nħobbu l-faqar u lill-foqra.

Missierna, Sliema għal għaxar darbiet, Glorja. Il-grazzja tal-misteru tat-Tweild tinżel ġewwa fija u tagħmilni tassew fqir fl-ispirtu.

Ir-raba’ posta Noffrulek, Mulej Ġesù, din ir-raba’ posta f’ġieħ il-Preżentazzjoni tiegħek fit-tempju minn idejn Marija. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk id-don tal-għerf u tas-safa tal-qalb u tal-ġisem.

Missierna, Sliema għal għaxar darbiet, Glorja. Il-grazzja tal-misteru tal-Preżentazzjoni tinżel ġewwa fija u tagħmilni tassew għaref u safi.

Il-ħames posta Noffrulek, Mulej Ġesù, din il-ħames posta f’ġieħ meta Sidtna Marija sabitek fit-tempju fost l-għorrief, wara li kienet tilfitek. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li tikkonvertina lilna u lill-midinbin, eretiċi, xiżmatiċi u idolaturi kollha.

Missierna, Sliema għal għaxar darbiet, Glorja. Il-grazzja tal-misteru ta’ meta Ġesù nstab fit-tempju tinżel ġewwa fija biex nikkonverti bis-serjeta’.

Il-Misteri tat-Tbatija

3. Is-sitt posta Noffrulek, Mulej Ġesù, din is-sitt posta f’ġieħ l-Agunija kbira tiegħek fil-Ġnien taż-Żebbuġ. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li tagħtina ndiema sħiħa għal dnubietna u li naqblu dejjem mar-rieda qaddisa tiegħek.

Missierna, Sliema għal għaxar darbiet, Glorja. Il-grazzja tal-misteru tal-Agunija ta’ Ġesù tinżel ġewwa fija u tagħmilni tassew niedem u għal kollox ubbidjenti għar-rieda t’Alla.

Is-seba’ posta Noffrulek, Mulej Ġesù, din is-seba’ posta f’ġieħ il-Flaġellazzjoni kiefra tiegħek. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li nrażżnu s-sensi tagħna.

Missierna, Sliema għal għaxar darbiet, Glorja. Il-grazzja tal-misteru tal-Flaġellazzjoni tinżel ġewwa fija u tgaħmilni li jiena tassew inrażżan lili nnifsi.

It-tmien posta Noffrulek, Mulej Ġesù, din it-tmien posta f’ġieħ l-Inkurunazzjoni tiegħek bix-xewk. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbok stmerrija kbira għad-dinja.

Missierna, Sliema għal għaxar darbiet, Glorja. Il-grazzja tal-misteru tal-Inkurunazzjoni tinżel ġewwa fija u tagħmilni nistmerr id-dinja.

Id-disa’ posta Noffrulek,  Mulej Ġesù, din id-disa’ posta f’ġieħ meta erfajt salibek. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li tagħtina sabar kbir aħna u nerfgħu salibna fuq il-passi tiegħek il-jiem kollha ta’ ħajjitna.

Missierna, Sliema għal għaxar darbiet, Glorja. Il-grazzja tal-misteru ta’ meta Ġesu’ refa’ s-salib tinsel ġewwa fija u tagħmilni xempju tas-sabar.

L-għaxar posta Noffrulek, Mulej Ġesù, din l-għaxar posta f’ġieħ meta Sallbuk fuq il-Kalvarju. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk li tnissel fina mibgħeda kbira lejn id-dnub, imħabba lejn is-salib u l-grazzja ta’ mewt qaddisa għalina u għal dawk li qegħdin fl-aħħar agunija tagħhom.

Missierna, Sliema għal għaxar darbiet, Glorja. Il-grazzja tal-misteru tal-Passjoni u tal-Mewt tas-Sinjur Tagħna u Salvatur Ġesù Kristu tinżel ġewwa fija u tagħmilni tassew qaddis.

Il-Misteri tal-Glorja

4. Il-ħdax-il posta Noffrulek, Mulej Ġesù, din il-ħdax-il posta f’ġieħ il-Qawmien rebbieħ tiegħek mill-mewt. Bis-saħħa ta’ dan il-misteru u bis-saħħa tal-interċessjoni ta’ Ommok l-iżjed qaddisa, nitolbuk fidi ħajja.

Missierna, Sliema għal għaxar darbiet, Glorja. Il-grazzja tal-misteru tal-Qawmien mill-imwiet tinżel ġewwa fija u twettaqni tassew fil-fidi.

It-tnax-il posta Noffrulek, Mulej Ġesù, din it-tnax-il posta f’ġieħ it-Tlugħ glorjuż tiegħek fis-sema. Bis-saħħa ta’ dan il-misteru u bl-interċessjoni ta’ Ommok l-iżjed qaddisa, nitolbuk tama qawwija u xenqa kbira għall-ġenna.

Missierna, Sliema għal għaxar darbiet, Glorja. Il-grazzja tal-misteru tat-Tlugħ fis-sema tal-Mulej tinżel ġewwa fija u tippreparani għall-ġenna.

It-tlettax-il posta Noffrulek, O Spirtu Qaddis, din it-tlettax-il posta f’ġieħ il-misteru ta’ Pentekoste. Bis-saħħa ta’ dan il-misteru u bl-interċessjoni ta’ Marija, l-għarusa tiegħek l-iżjed qaddisa, nitolbuk li tagħtina l-għerf qaddis tiegħek biex inkunu nafu, niggustaw u nipprattikaw il-verita’ tiegħek u naqsmuha ma’ kulħadd.

Missierna, Sliema għal għaxar darbiet, Glorja. Il-grazzja ta’ Pentekoste tinżel ġewwa fija u tagħmilni għaref f’għajnejn Alla.

L-erbatax-il posta Noffrulek, Mulej Ġesù, din l-erbatax-il posta f’ġieħ it-Tnissil bla Tebgħa ta’ Ommok Marija Santissima u t-Tlugħ tagħha fis-sema bir-ruħ u l-ġisem. Bis-saħħa ta’ dawn iż-żewġ misteri u bl-interċessjoni tagħha, nitolbu għar-rigal tad-devozzjoni vera lejha biex ngħixu ħajja tajba u nagħmlu mewta qaddisa.

Missierna, Sliema għal għaxar darbiet, Glorja. Il-grazzja tat-Tnissil bla Tebgħa u tat-Tlugħ fis-sema ta’ Marija tinżel ġewwa fija u tagħmilni tassew devot tagħha.

Il-ħmistax-il posta Noffrulek, Mulej Ġesù, din il-ħmistax u l-aħħar posta f’ġieħ l-Inkurunazzjoni glorjuża ta’ Ommok Marija Santissima fis-sema. Bis-saħħa ta’ dan il-misteru u bl-interċessjoni tagħna, nitolbuk il-grazzja tal-perseveranza, li nibqgħu nikbru fil-virtu’ sal-punt tal-mewt u wara dan il-kuruna li ma tintemm qatt li hija mħejjija għalina. Nitolbu l-istess grazzja għan-nies tajbin kollha u għall-benefatturi kollha tagħna.

Missierna, Sliema għal għaxar darbiet, Glorja.

5. Nitolbuk, Mulej Ġesù, bis-saħħa tal-ħmistax-il misteru tal-ħajja, mewt, passjoni u glorja tiegħek u tal-merti ta’ Ommok Marija Santissima, li tikkonverti lill-midinbin, li tieqaf mal-moribondi, li teħles l-erwieħ mill-purgatorju u li tagħtina lkoll il-grazzja tiegħek biex inkunu nistgħu ngħixu ħajja tajba u nagħmlu mewta tajba. Nitolbu wkoll għad-dawl tal-glorja biex narawk wiċċ imb’wiċċ u nħobbuk għall-eternita’ kollha. Ammen.